LLITERATU PORTADA
LA CITA: "Ye amargosa la victoria na derrota, / el facese héroe ensin que naide lo sepa / por nun poder facer otra cosa / que nun abandonar / nunca." José Luis Rendueles
Accesu Rápidu
EDICIÓN 14
01 de xineru de 2008
Xunta d'Escritores Asturianos 2008
Autores Asturianos
Acevedo y Huelves, Bernardo
Biografía

Alias :  Barón de Overcade
Nacimientu:  20-V-1849 - Bual / Boal
Defunción:  1920 - Uviéu / Oviedo

Poeta esquisitu en castellán, gallego-asturianu y n’asturianu, varies vegaes emponderáu, y prosista de pluma galana y documentada, especialmente en temes folklóricos y xurídicos; fecundó en versu y en prosa, y tuvo enclín d’escritor que compartió munchos años n’Uviéu colos deberes de l’abogacía del Estáu que desendolcaba.

Magar que vivió hasta los nuestros díes, malapenes se conserva más recuerdu que de personalidaes desaparecíes fai sieglos. El llugar y la fecha de nacimientu d’Acevedo y Huelves anótense equivocadamente por munchos.

Naz na villa de Bual el 20 de mayu de 1849, fíu del famosu mélicu y ciruxanu don Xosé Acevedo y doña Antonia Huelves y Pantoja.

Taba na primera infancia cuando’l pá foi destináu a Cuaña como mélico titular.

Allugó entóncenes la so familia la residencia n’El Espín- onde suponen dalgunos, equivocadamente, que nació don Bernardo-,y equí cursó les primeres lletres y los estudios de les llenguas llatina y francesa, que llegó a traducir con toa perfección.

Tal vez nun pasaríen d’equí los sos estudios, debío a la posición modesta de los padres, si’l filántropu don Fernando Casariego nun fundare per entós l’Institutu de Tapia, nel que cursó’l bachilleratu. Movíu pol deseyu del pá, que non por propia vocación, pasó dempués a Madrid a cursar la carrera de Melicina, estudios que, ensin embargu, fizo con gran aprovechamientu, polo que’l doctor Velasco túvolu al so llau como ayudante.

Pero’l fallecimientu del pá, cuando yá taba prósimu a concluyir la carrera, llibrólu de seguila contra la so voluntá, y abandonó los estudios de la Melicina.

Por embargu esa negativa aptitú de mélicu, paez que conservó siempre cierta tendencia de tal; pues cuenta Juan Menéndez Pidal que d’esos estudios quedó-y l’‘afición a recetar, en cuanto dalguno de sus amigos se quexa de falta de salú’. A esos años d’estudiante na Facultá de San Carlos correspuende la so iniciación d’escritor, y indícase “El Anunciador”, d’Uviéu, como’l periódicu que recoyó les sos primeres producciones.

Dalgunes poesíes y cróniques publicaes en periódicos de Madrid proporcionáron-y les primeres estimaciones nos círculos lliterarios. Dimpuestu a poseyer una carrera más en consonancia col so enclín natural, siguió la de Drechu, ayudándose económicamente col ingresu de modestos destinos nel Rexistru de la Propiedá y na Delegación de Facienda, hasta obtener la llicenciatura en 1873, probablemente.

El so propósitu yera facer oposiciones pa abogáu del Estáu. Don Ramón Pérez Santa María, que foi amigu d’Acevedo y Huelves, refirió a esti propósitu’l siguiente episodiu: ‘Cuando foron anunciaes oposiciones pal ingresu nel Cuerpu d’Abogaos del Estáu, varios condiscípulos y amigos de don Bernardo instáronlu a que fundara una Academia preparatoria.

Asina lo fizo, dándose’l casu de que cásique tolos sos discípulos algamaron plaza con bon númberu, mientres él quedó ensin ninguna, con asombru de los sos alumnos y de munches persones que nun yeren a comprender l’absurdu de que fore desaprobáu’l maestru y los discípulos realizaren, gracies a él, exercicios premiaos con plaza.

N’otres oposiciones, les inmediates-él mesmu me lo contó-,tamién quedaba ensin plaza, a pesar de qu’esa vez vertiera sobro’l Tribunal un diluvio de recomendaciones, polo qu’él dicía: El cuartu exerciciu llevélu bien preparáu.

Aquello produxo, por inxusto e inesplicable, un escándalu que determinó’l fechu siguiente: El fíu d’un carniceru asturianu establecíu en Madrid, llamáu Carina, preparárase con don Bernardo pa les mesmes oposiciones y algamara plaza que nun pensaba desempeñar y que, por da-yos gustu a los padres, consiguiera na Dirección xeneral del ramu mediante’l pagu de tres mil pesetes-.

Dispuestu esti xoven a xugase’l too pol too, presentóse n’onde comprare l’aprobación de los exercicios, amenazando con armar un escándalu si al so maestru nun se-y daba plaza, y hasta ofreció en bon arreglu la que-y correspondía a él; y como’l mozu yera d’arrestos y mui capaz de cumplir les amenaces, agregóse a la llista d’aprobados el nome d’Acevedo y Huelves n’último llugar, colo que pudo conseguir plaza’. Esti sucesu correspuende al añu 1889 en que foi destináu d’abogáu del Estáu, nel mes de xunetu, a Uviéu, al serviciu de la Delegación de Facienda y de la Diputación provincial. Ente los sos años de Melicina y el del so treslláu a Uviéu con dichu cargu oficial cuerre una llarga época de la so vida en que l’escritor, ensin producir entóncenes el so llabor más importante y duradera, supo conquistase una firma respetable.

El poeta ofrezse yá perfertamente llográu nes colunes del periódicu uvieín “El Eco de Asturias”, en que, ente frecuentes collaboraciones, publicó una mui cellebrada oda, en 1869, contra’l pretendiente al tronu, duque de Montpensier.

Poco dempués, una elexía con motivu del asesinatu cometíu polos insurrectos cubanos col periodista uvieín Gonzalo Castañón, conságralu como tienru y elegante poeta.

Y confírmen-y, años alante, dos premios obtenidos casi simultáneamente: nel certame lliterariu cellebráu pola Universidá d’Uviéu con motivu del segundu Centenariu de Calderón (1881), cola poesía “Asturias”, firmada col anagrama de Barón de Overcade, y nos “Juegos Florales” de 1883, cellebraos baxo los auspicios de la Sociedá Económica d’Amigos del País, n’ocasión de les feries de San Mateo, cola poesía “La hoz de la venganza”.

Estes dos composiciones recoyóles dempués nel volume señaláu. En versu y en prosa les sos collaboraciones estiéndense a otros periódicos asturianos, ente los que figuren los uvieínos El Nalón, La Opinión de Asturias, Revista de Asturias y El Carbayón, y tamién a delles espublizaciones madrilanes.

L’asturianismu na ausencia patentizalu con entusiastes y deinteresaes aportaciones a la Fundación del Centru d’Asturianos de Madrid (depués, Centro Asturiano), y col empiezu en 1885 del Boletín, órganu oficial d’esa institución, que dirixó hasta xineru de 1888 y no que culminó la so actividá periodística hasta entós.

Tamién formó parte de la Xunta directiva de dichu Centru como vicepresidente segundu y primeru nos años 87 y 88. Una muestra de gran voluntá pal estudiu dala nesta época col aprendizax en breve tiempu de la Taquigrafía, dominándola con tan estraordinaria habilidá, que mereció la calificación de sobresaliente delantre un xuráu compuestu por taquígrafos del Congresu.

Figuró dempués ente los fundadores del Atenéu Taquigráficu madrilanu. Yá establecíu n’Uviéu a favor de la vida apacible provinciana y cubiertes, anque malamente, les os modestes necesidaes col destín d’abogáu del Estáu, pudo desendolcar más en serio la so producción d’escritor, como lo demuestra la relación de obres en volume, ensin abandonar por ello l’otru llabor destináu a los periódicos, ente la que merez mención especial la dirección n’El Carbayón d’una páxina selmanal destinada a estudios populares, denominada Estafa de la Quintana.

Tamién figuró ente los principales collaboradores de la obra Asturias, publicada por entregues (1894-1900) por Octavio Bellmunt y Fermín Canella y Secades. Con esti autor autor fundó n’Uviéu una Biblioteca Jurídico- Escolar, na que se publicaron varios volúmenes de diversos autores. El poeta, entretanto, continuó dando’l frutu de su numen a publicaciones asturianes y madrilanes y conquistando galardones en certámenes públicos.

Nel cellebráu en Xixón con motivo d’inagurase’l monumentu a Xovellanos; nos Xuegos Florales uvieínos de 1900 cola oda en castellán La nueva Asturias, premiada cola Flor natural, y nos Xuegos Florales de Zaragoza de 1902 cola composición en llingua asturiana “L’ esconxuru” Ente los cargos a que lu elevaron figura’l de vocal de la Comisión provincial de Monumentos, puesto en que lu avaloriaba la so calidá d’académicu correspondiente de l’Academia de la Historia (1900) y de la Lengua (1914). Viudu, Acevedo y Huelves de doña Victorina Sánchez Montero, en xineru de 1912, un amor románticu de sexagenariu por la señorita Fernandez de la Llana, llevólu a contraer segundes nupcies nel mesmu mes del añu siguiente, tocándo-y a ella sobrevivilu dende 1920.

<< Listáu de Autores

<< Tornar al Entamu



El Personaxe
01 de xineru de 2008
Carlos Rubiera va abrir la Xunta d'Escritores 2008

L'escritor asturianu Carlos Rubiera abrirá la Xunta d'escritores Asturianos Uviéu 2008 esti próximu miércoles 2 de xineru con una conferencia sobre'l compromisu del escritor asturianu más p'allá de lo estético. L'actu tendrá llugar na Biblioteca del Campu San Francisco a partir de les 5'30 la tarde, llueu de la presentación del llibru d'Actes de la Xunta de 2005. Carlos Rubiera Tuya nació’l 2 de febreru de de 1956 en Cabueñes (Xixón) anque al pocu tiempu la familia treslladose a Garvelles, na parroquia xixonesa de Caldones, onde sigue residiendo anguaño. Tres d’estudiar Maxisteriu na Universidá d'Uviéu y Música nos conservatorios d'Uviéu y Xixón, dedicóse profesionalmente a la enseñanza. Anguaño ye profesor de Música y Asturianu nel colexu El Bosquín de L'Entregu. Carlos Rubiera destaca pol so llabor na difusión de la llingua asturiana, non solo como cantante y escritor, sinón tamién como responsable de les clases de bable na Universidá Popular, o presentador de programes nel centru territorial de Televisión Española y na emisora Radio Mar de Xixón. Yá dende mediaos de los años setenta apaez vinculáu a les actividaes de Conceyu Bable de Xixón y collabora na sección en Alitar Asturies del diariu El Comercio. Dellos años más tarde foi ún de los primeros miembros de númberu de l’Academia de la Llingua Asturiana.


Fuente: Redacción.

Lleer más >>

Col sofitu de la Conseyería de Cultura, Comunicación Social y Turismu
© 2004 LLITERATU.com -
  |  Publicidá  |  Condiciones d'Usu  |  Información d'Empresa  |  Contacte con nós  |