LLITERATU PORTADA
LA CITA: "Espierto en cada suañu col suañu col que Dalguién suaña'l mundu. / Ye viéspora de Dios. Ta xuntando en nosotros los sos pedazos." Olga Orozco
Accesu Rápidu
EDICIÓN 14
26 d'ochobre de 2007
II Conceyu Internacional de Lliteratura Asturiana
Autores Asturianos
Canella y Secades, Fermín
Biografía

Nacimientu:  7-VII-1849 - Uviéu / Oviedo
Defunción:  22-III-1924 - Uviéu / Oviedo

Cronista d’Uviéu, caderalgu y rector de la universidá uvieína.

Naz na capital asturiana en 1849 y muerre na mesma ciudá en 1924.

Estudia Filosofía y Lletres y drechu na Universidá Uvieína onde se llicenció en Lleis en 1869.

Al añu siguiente algamó’l doctoráu.

Darréu foi nomáu profesor ausiliar de la Universidá, na que, al poco, en 1876, algamó por oposición una cátedra de Drechu civil.

En 1882 foi designáu vicerrector, y en 1883, xunta Barrio y Mier, representó a la universidá uvieína nel congresu xurídicu cellebráu en Madrid.

En 1906 foi ellexíu rector y, como tal, organizó y presidió los actos que conmemoraben en 1908 el tercer centenariu de la apertura de la Universidá de Uviéu.

Por cuenta d’esto tuvieron equí les universidaes más prestixoses d’Europa y América.

En 1913 foi ellexíu senador pola universidá.

Como catedráticu y universitariu gozó de muncha sonadía, por cuenta de que yera un pedagogu curiosu y entreteníu que tenía fama d’enseñar de manera entretenía la ciencia xurídica de la so asignatura.

Figuró tamién en delles comisiones pa reformes ya informes sobre Llexislación ya Istrucción pública, y foi llamáu pa desplicar un cursín na Universidá de Burdeos en 1909.

Poco dempués el Gobiernu Francés concéde-y la Encomienda de la Llexón d’Honor. Foi una figura mui popular en toa Asturies, que llegó a ser proverbial y colos años patriarcal y venerable; tuteaba a tol mundu, cosa daquella poco frecuente, y a los mozos y a los sos contemporáneos tratábalos col apellativu de “chacho”.

Asistía a munches tertulies porque yera ún de los pocos homes que tenía tiempu pa too; prestába-y falar l’asturianu y bilordiar nesta llingua.

Nun tuvo significación política relevante y trataba pa colos homes de toles idees.

Yera conversador prestosu al que toos queríen.

Foi amigu y compañeru de los Estrada, los Ordoñez, los Álvarez Amandi y los Barrio Mier carlistes, como de los “Clarín”, los Posada, los Altamira y los Álvarez-Buylla republicanos.

Mantuvo estrenches rellaciones colos obispos Sanz Florés y Martínez Vigil. La so obra, tocántenes a la cultura asturiana, ye mui intensa; pol cargu de so pa, que fore munchos años secretariu xeneral de la universidá, y pola dedicación de tola so vida a esta, tuvo siempres venceyáu mui estrenchamente al primer centru cultural d’Asturies.

Exerció l’abogacía y foi delles vegaes vocal del Ilustre Colexu d’Abogaos d’Uviéu.

Tuvo al empar una costante dedicación al periodismu; de mozu creara en 1866 el periódicu “El Apolo” y durante tola so vida collaborara activamente na prensa rexonal y nacional.

D’esta miente, escribió en revistes como “La Ilustración gallega y asturiana, na qu’amás de los numberosos artículos publicó una sección titulada “Efemérides”, na que se recoyíen los principales acontecimientos de la Historia d’Asturies.

Tolos diarios daquella contaron cola so collaboración más o menos frecuente, ente ellos “El Faro Asturiano”, “El Porvenir de Asturias”,”El Eco de Asturias”, “El Carbayón”, y otros que llegaron a exercer positiva influencia nel Principáu.

Foi conferenciante mui queríu y estimáu, coincidiendo con Estrada y Barrio y Mier nes campañes en pro de facer llegar a toos educación y cultura, y poco dempués, con Aramburu, Buylla, Posada y Altamira y Sela participó na campaña llamada d’”Extensión Universitaria” que tanta fama y dio a la Universidá.

A comuña col eruditu y mélicu Octavio Bellmunt, planeó y dirixó la magana obra “Asturias”, historia y miscelánea de la rexón que foi editada con munchu lluxu acordies colos avances tipográficos.

Contó coles collaboraciones más estimaes publicando n’ella Menéndez Pidal uno de los sos primeros trabayos.

Llibros mui famosos foron los “Estudios Asturianos (Cartafueyos d’Asturies)”; la “Historia de la Universidad de Oviedo y noticia de los establecimientos de enseñanza de su distrito”, que Canella publicó en 1873 reeditada con notables ampliaciones en 1903.

Creó tamién una pinacoteca que foi destruyida na revolución d’ochobre de 1934.

Foi Cronista d’Uviéu, miembru correspondiente de la Real Academia Española y de les de la Historia, de la de les Nobles Artes de San Fernando, Buenas Letras de Sevilla y Barcelona.

<< Listáu de Autores

<< Tornar al Entamu



El Reportaxe
26 d'ochobre de 2007
Un averamientu a la hestoria del cómic n'asturianu

Dientro del II Congresu de Lliteratura Asturiana de l'Academia de la Llingua Asturiana va celebrase una conferencia de Chechu García y Próspero N. García, que va percorrer la hestoria del cómic en llingua asturiana. Ufiertamos equí un resume de Chechu García sobre la hestoria d'esti xéneru que lleva un tiempu estudiando a fondu.


Chechu García/Redacción.

Lleer más >>

Col sofitu de la Conseyería de Cultura, Comunicación Social y Turismu
© 2004 LLITERATU.com -
  |  Publicidá  |  Condiciones d'Usu  |  Información d'Empresa  |  Contacte con nós  |