LLITERATU PORTADA
LA CITA: "Equí les sos manes / perdíes nel incansable dibuxu de lletres / como pequeños estandartes / nel destín nacional de piedra" Méndez Ferrín
Accesu Rápidu
EDICIÓN 13
05 de payares de 2007
Novedaes lliteraries del añu 2007
Autores Asturianos
Beato de Liébana
Biografía

Beato vivió ente aprosimadamente´l 730 y los primeros años del sieglu IX, polo que centra´l so llabor nel trechu que va ente Silo y Alfonso II. Quiciabes del partíu políticu y relixosu d´ésti últimu y d´Adosinda nes lluches civiles de la dómina (hipótesis que brama si se-y reconoz l´autoría del mauregatista «Himnu a Santiago»), y polemista terriu contra Elipando, sábese poco en cierto de la so biografía.

Anque un soberbiosu Elipando sorraya la so condición d´astórdigu norteñu a la de refronta-y les sos pretensiones d´aprende-yos doctrina a los toledanos, dellos autores quieren inclinase por un supuestu orixe meridional qu´esplicaría la so sólida formación, imposible, d´acordies con estes intepretaciones, nes rimaes del cordal cantábricu.

Menciónase sistemáticamente, en tou casu, como llebaniegu, y, en cierto, foi probablemente monxu del monesteriu de Santu Toribo de Llébana, y abá aínde, anque sobre ésti puntu nun coinciden la xeneralidá de contemporanios (asina, Albaro de Córdoba), que tamién suelen referise a él como "presbyte". Pero, con independencia del so aniciu, o quiciabes más bien del de los materiales bibliográficos que pudiera dir atropando nel so montascosu monesteriu astur-cántabru o nes mesmes corte cangueta y praviana, otros autores sorrayen la so posible estadía mientres un tiempu na Francia carolinxa, na que pudo peracabar la so sólida formación intelectual, incluso no que fai al so conocimientu y familiaridá coles obres de San Isidoro de Sevilla, d´acusada influencia na so producción propia.

Sábese, de fechu, que mantuvo correspondencia con ún de los cabezaleros intelectuales del imperiu carolinxu: l´inglés Alcuino de York, que se refier na so obra al llebaniegu en cuenta d´aponderalu y declarase discípulu de so. D´ente les sos obres, conócense les polémiques contra Elipando, a comuña con Heterio d´Osma («Adversus contra Elipando» o tamién «Apologético» de contra´l 786), síntesis de la postura ortodoxa nel discutiniu, al traviés d´un discursu a medies ente la raxón dogmática y dél inxeniu satíricu: "testiculus Antichristi" llamaba Beato, valiéndose de cierta alegoría bíblica, al heresiarca toledanu, que, pela so parte, más acullá de sotileces teolóxiques, nun tatexaba a la d´acusalu de luxuriosu y amigu d´andar a prostitutes. D´otru xacer, son los sos famosos «Comentarios al Apocalipsis», obra en dolce llibros con una primer redacción d´ente 776-786.

Tresmitida al traviés de distintos códices, que recueyen una serie d´interpretaciones y reflexones erudites en tornu a los pasaxes bíblicos que predicen y describen l´acabu del mundu, perfaise nesta obra una singular visión apocalíptica significativa del mundu mental del momentu, que va dexar resclavos en delles obres hispániques posteriores, como´l «Indiculus de Aduentu Enoch et Eliae atque Antichristi», fecháu a primeros del sieglu IX y al que davezu se-y supón un autor mozárabe, anque autores como Bodelón nun refuguen la posibilidá d´una obra d´aniciu norteñu. Esta medrana apocalíptica xustificábase, nel momentu históricu de Beato, por cuenta del inminente cumplimientu del añu 6.000 dende la Creación, según delles interpretaciones de la «Biblia», que-y ponía fin a la sesta edá del mundu coincidiendo col 800 de la era cristiana.

Sía como quier, la lliteratura apocalíptica nun carecía daquella d´una llarga tradición anterior.

De mano, fora enforma discutida la inclusión ente les escritures canóniques de la Ilesia del peculiar «Llibru del Apocalipsis», atribuyíu a Xuan l´Evanxelista, anque la ilesia occidental acabó aceptándolu en feches relativamente tempranes, de manera que yá nel sieglu VII el IV Conciliu de Toledo prescribía la so llectura obligada nel conxuntu d´Hispania.

Los primeros comentarios al llibru remonten, por embargu, al sieglu IV, teniendo que se destacar los de Victorio de Pettau y, darréu, los de San Xeromo.

Sicasí, la tradición apocalíptica hispana (y la del propiu Beato) paez unviar no fondero a los comentarios del donatista norteafricanu Ticonio, bien que col intermediu d´otru de los grandes intelectuales cristianos: el tamién africanu San Agustín.

Nel entornu cronolóxicu y xeográficu más inmediatu tienen que se citar como antecedentes l´hispanu Aprinxo de Beja, Casiodoro y Cesáreo d´Arlés, a lo mesmo que´l so coetaniu, el británicu Beda. Pérez de Urbel atribúi-y tamién a Beato de Lleábana ciertu «Liber homiliarum» conserváu nun códiz del X de Santillana del Mar, qu´amuesa la particularidá d´entemecer elementos llitúrxicos mozárabes y ultrapirenaicos.

Coles mesmes, dellos autores (dende´l propiu Justo Pérez de Urbel) atribúyen-y finalmente a Beato l´autoría del himnu coetaniu «O Dei Verbum», basándose precisamente en delles analoxíes del testu colos «Comentarios al Apocalipsis».

Tala posibilidá, anque non imposible, ye anguaño enforma discutida.

<< Listáu de Autores

<< Tornar al Entamu


El Reportaxe
05 de payares de 2007
Añu intensu pal sector editorial asturianu

Nuna industria que suel ser abondo estática como ye la del sector editorial, esti añu ta siendo un añu de munchu movimientu y del entamu de nueves iniciatives. Nel casu de les editoriales Ámbitu y Trabe, l’añu entamaba con nueves actividaes, entrando dambes dos nel negociu audivisual al traviés de la producción de programes pa la TPA. La primera produz Pieces y Camín de cantares y la segunda dellos espacios dientro del programa Con dos de azucar, que más tarde van convertise nun programa diariu independiente: Al Aldu. Por embargu, la llegada al cargu de Directora Xeneral de Cultura y Política Llingüística diba facer que’l dueñu d’Ediciones Trabe vendiera la so empresa editorial al empresariu Inaciu Iglesias, ún de los accionistes principales d’Ámbitu.
Redacción./I.G.

Lleer más >>


Poemes
El duelgu de to enfadu
05 de payares de 2007
Unviáu por: José Ángel Gayol
Lleer poema >> << Participar >>
El to nome
05 de payares de 2007
Unviáu por: Henrique Facuriella
Lleer poema >> << Participar >>
Col sofitu de la Conseyería de Cultura, Comunicación Social y Turismu
© 2004 LLITERATU.com -
  |  Publicidá  |  Condiciones d'Usu  |  Información d'Empresa  |  Contacte con nós  |