Nacimientu:  4-VIII-1870 - Benavente (Zamora)
Defunción:  28-IX-1925 - Salamanca

Eclesiásticu, canonista y obispu nacíu’l 4 d’agostu de 1870 en Benavente (Zamora).

Fexo estudios de bachilleratu nel Institutu Provincial de Zamora, dende onde pasó pal Seminariu d’Uviéu, nel qu’entamó les carreres de Filosofía y Teoloxía.

Becáu pol Colexu Español de San Xosé, continuó los estudios en Roma, algamando la llicenciatura en Teoloxía na Universidá Gregoriana y el grau de doctor “in utroque iure”, con premiu estraordinariu, nel Seminariu Pontificiu Romanu de San Apolinar.

Asina mesmo, fexo estudios n’Academia Hestórico-Xurídica Lleonina y participó por un añu nos trabayos del Estudiu de la Sagrada Congregación del Conciliu.

Ordenóse de presbíteru en Roma’l 25 de xunetu de 1895, tornando pa la Diócesis d’Uviéu, onde lu nomaron profesor de Drechu canónicu del Seminariu Diocesanu, cargu que desendolcó por dieciséis años.

Foi Teniente Provisor y Teniente Vicariu Xeneral del Obispu Martínez Vigil, dende’l 4 d’abril de 1899; Provisor, Vicariu Xeneral y Delegáu de Capellaníes, dende’l 10 d’abril de 1901, Maxistral de la Catedral, dende’l 4 de payares de 1904 y Doctoral, el 2 d’avientu de 1911.

Al empar, desempeñó dellos llabores pastorales, sobre tou nes Escueles Nocherniegues y nel Círculu d’Obreros Católicos de la ciudá. Preconizáu obispu de Plasencia’l 26 de marzu de 1915 y consagráu pol cardenal Guisasola na Catedral d’Uviéu’l 14 de setiembre, entró na Diócesis estremeña el 10 d’ochobre del mesmu añu.

Foi senador pola provincia eclesiástica de Toledo (1919), Gran Cruz d’Isabel la Católica (1920) y académicu correspondiente de Belles Artes y Ciencies Hestóriques de Toledo.

El 26 d’ochobre de 1924 preconizáronlu obispu de Salamanca y el 25 de mayu de 1925 entró na Diócesis.

Morrió na ciudá castellana’l 28 d’avientu de 1925.

<< Listáu de Autores

<< Tornar al Entamu