LLITERATU PORTADA
LA CITA: "¿Cómo yéremos a ver con tanta lluz?" Milio Rodríguez Cueto
Accesu Rápidu
EDICIÓN 14
01 de xineru de 2008
Xunta d'Escritores Asturianos 2008
Autores Asturianos
Álvarez Cabal, Melquíades
Biografía

Nacimientu:  ??-??-1864 - Xixón / Gijón
Defunción:  ??-VIII-1936 - Madrid

Naz en Xixón en 1864.

Ye un políticu destacáu na vida pública española del primer terciu del sieglu XX. Entama les sos actividaes como políticu tres de cursar estudios de Drechu na Universidá d’Uviéu, na que consiguió graduase en 1883.

Tres d’un primer intentu fallíu consiguió (1889) la cátedra de drechu Romanu de la Universidá asturiana, situación académica que lu punxo en contactu col grupu de profesores que protagonizaron la Estensión Universitaria influyíos pola Istitución Llibre d’Enseñanza.

De toes toes, la so vocación política impulsólu a la participación nes elecciones de diputaos a cortes convocaes en 1898 por la circunscripción d’Uviéu sustituyendo a Manuel Pedregal Cañedo, candidatu del republicanismu tradicional.

Magar que consiguió’l triunfu, les presiones en contra exercíes pol políticu conservador Alejandro Pidal y Mon consiguieron que’l so puestu fore declaráu vacante nel Congresu.

En 1901 triunfa otra vegada apoyáu pol republicanismu urbanu d’Uviéu y Xixón, principalmente, al qu’arrastró pentemedies de les sos dotes oratories, de lo que dexó testimoniu Azorín y Clarín.

Daquella’l so escañu pasa a enanchar el del partíu Unión Republicana, de Nicolás Salmerón.

La coincidencia d’intereses republicanos y socialistes ante los partíos dinásticos preparó la conxunción d’aquellos en 1909 a escala nacional, fenómenu que se produxo n’Asturies cola confluencia conxunta de Pablo Iglesias y Melquíades Álvarez delantre de la clase obrera de les cuenques, principalmente en 1911 na cellebración del famosu mitín de Santumianu.

Al añu siguiente –abril de 1912- tuvo llugar nel Palaciu del Retiru la fundación del Partíu Reformista, con una formulación del tipu “accidentalista en cuantes a la forma de gobiernu propugnada” en pallabres de Melquíades Álvarez.

Ello equival a la compatibilidá del nuevu partíu cola monarquía si esta accedía a una revitalización pentemedies d’una costitución.

A esti partíu amestáronse-y abondosos intelectuales: Galdós, Ortega y Gasset, Américo Castro, Morente, Manuel Azaña, Pérez Ayala, etc., faciéndose Melquíades Álvarez famosu amás de poles sesiones polítiques polos banquetes cellebraos en dellos hoteles madrileños onde se vía rodiáu de numberosos siguidores.

Magar qu’esti partíu nun fore bon vistu pola conxunción republicano-socialista, Melquíades Álvarez participa activamente na fuelga de 1917 dende la so residencia asturiana.

Por embargu, el distanciamientu del socialismu a partir d’aquel movimientu, fai que Melquíades Álvarez s’avere a los monárquicos, aceptando d’Alfonso XIII la presidencia del congresu de diputaos en 1923, precisamente na tensa atsmósfera que los sucesos venceyaos al desastre al exércitu español n’Annual provocaron sobro’l panorama nacional.

Magar que Melquíades Álvarez xustificó’l comportamientu políticu, munchos de los siguidores foron alloñándose pa dir a partíos más republicanos.

Durante la dictadura de Primo de Rivera manifestóse en contra liderando’l manifiestu de 1926 xunta otros monárquicos defensores del sistema costitucional.

Cola llegada de la República’l Partíu Reformista cambió a Partíu lliberal Demócrata y Melquíades Álvarez siguió al frente del mesmu, pero la so fuerza disminuyó considerablemente.

Foi acusáu pola izquierda d’alendar el llevantamientu de 1932 y condenó’l llevantamientu de 1934.

N’agostu de 1936 y en metada de la gran confusión del llevantamientu de xunetu, foi executáu na cárcel Modelo de Madrid.

<< Listáu de Autores

<< Tornar al Entamu


El Personaxe
01 de xineru de 2008
Carlos Rubiera va abrir la Xunta d'Escritores 2008

L'escritor asturianu Carlos Rubiera abrirá la Xunta d'escritores Asturianos Uviéu 2008 esti próximu miércoles 2 de xineru con una conferencia sobre'l compromisu del escritor asturianu más p'allá de lo estético. L'actu tendrá llugar na Biblioteca del Campu San Francisco a partir de les 5'30 la tarde, llueu de la presentación del llibru d'Actes de la Xunta de 2005. Carlos Rubiera Tuya nació’l 2 de febreru de de 1956 en Cabueñes (Xixón) anque al pocu tiempu la familia treslladose a Garvelles, na parroquia xixonesa de Caldones, onde sigue residiendo anguaño. Tres d’estudiar Maxisteriu na Universidá d'Uviéu y Música nos conservatorios d'Uviéu y Xixón, dedicóse profesionalmente a la enseñanza. Anguaño ye profesor de Música y Asturianu nel colexu El Bosquín de L'Entregu. Carlos Rubiera destaca pol so llabor na difusión de la llingua asturiana, non solo como cantante y escritor, sinón tamién como responsable de les clases de bable na Universidá Popular, o presentador de programes nel centru territorial de Televisión Española y na emisora Radio Mar de Xixón. Yá dende mediaos de los años setenta apaez vinculáu a les actividaes de Conceyu Bable de Xixón y collabora na sección en Alitar Asturies del diariu El Comercio. Dellos años más tarde foi ún de los primeros miembros de númberu de l’Academia de la Llingua Asturiana.


Fuente: Redacción.

Lleer más >>


Col sofitu de la Conseyería de Cultura, Comunicación Social y Turismu
© 2004 LLITERATU.com -
  |  Publicidá  |  Condiciones d'Usu  |  Información d'Empresa  |  Contacte con nós  |