LLITERATU PORTADA
LA CITA: "Venimos de la nueche y hacia la nueche vamos. / Escucha. Yo llámote dende un reló de piedra, / onde caen les sombres, onde'l silenciu cai." Vicente Gerbasi
Accesu Rápidu
EDICIÓN 14
01 de xineru de 2008
Xunta d'Escritores Asturianos 2008
Autores Asturianos
Andrés Fernández, José Manuel de
Biografía

Alias :  Mánfer de la Llera
Nacimientu:  17-IV-1918 - Les Cuestes / Las Cuestas (Llangréu / Langreo)

José Manuel d’Andrés Fernández, más conocíu pol seudónimu de Mánfer de la Llera, nació en Les Cuestes, pueblu de la parroquia de Ciañu (Llangréu), el 7 d’abril de 1918. A los 8 y 9 años, siendo entoavía un rapacetu, yá andaba vendiendo periódicos pa Nicasio Hoces, pelos pueblos altos del conceyu de Llangréu, nes llendes del Conceyu hermanu de Mieres.

Los diarios vendíense a perrona y yera menester vociar los sos nomes y pregonar les noticies de más interés como reclamu.

D’esta dómina vien-y a Mánfer l’afición a escribir nos periódicos. En 1935 con 16 años, empecipia a trabayar de rampleru na empresa “Carbones Asturianos, S. A.”, nes mines de montaña, -nel primer y tercer pisu del grupu que güei se noma como “Pozu Samuño”.

Dempués de la guerra tornó a la empresa y ascendió a picador.

Y en 1948 pasó al Pozu María Lluisa en Ciañu, propiedá entoncies de la Sociedá Duro Felguera, onde trabayó de mineru y dempués de barrenista. En 1956 solicitáu pola casa sueca “Atlas Copco S.A.E.”, Mánfer de la Llera pasó a residir en Madrid desempeñando’l cargu de técnicu de formación, lo que-y valió pa viaxar y conocer cuasi toles mines d’España y delles zones de Francia.

Y en 1961, viviendo precisamente en Madrid, publicó nel selmanariu de la cuenca “Ecos del Nalón” un estensu artículu tituláu: “La fusión de los dos equipos llangreanos es el primer paso hacia el gran Langreo”, onde, con una visión futurista, fala de la unidá urbanística de Sama y La Felguera y los otros pequeños núcleos averaos pa configurar una única población o ciudá.

Cuasi cuasi como 23 años más tarde l’alcalde Aladino Fernández diba proponelo y diba ser aprobao por unanimidá nun plenu municipal. En 1954-56 Mánfer fo nomáu corresponsal informativu del diariu “La Voz de Asturias” en Sama de Llangréu, escribiendo cientos de cróniques, reportaxes y entrevistes onde defendió siempre los intereses de Llangréu y de Sama en particular tanto no urbanístico, social, cultural y deportivo.

Precisamente naquelles feches el Club Langreano nomólu cronista oficial del Club a tolos efeutos de portavoz deportivu na prensa, siendo varies veces enviáu especial a los partíos que’l Racing xugaba en Cantabria y en Galicia.

Estos cargos hubo d’abandonalos por razones llaborales al tener que fixar la so residencia na capital d’España.

Nos sos escritos paseó’l nome de La Llera per toa Asturies y parte d’España. Al comienzu de los años 50 formó parte de la Tertulia Llangreana Amigos del Arte (TLAA), xunto con Xosé León Delestal, Pedro Mario Herrero, Enrique Fernández Velasco “Fernanvel”, Benjamín Mateo Fernández, Manuel Coto, Juan Sánchez… En 1962, y con motivu d’una visita técnica enviáu pola casa “Atlas Copco” foi contratáu pola empresa “Solvay et Cie” y entró na plantía de Mines de Lieres como téunicu de preparación cola categoría de vixilante de 2ª, onde se xubila por silicosis en 1967. De 1968 al 1980 foi coordinador de l’Agrupación Rexonal de Pensionistes d’Asturies “ARPA”, entidá que defendía los intereses de los pensionistes y xubilaos asturianos, -daquella con unes pensiones de miseria- y que tuvo l’acción más importante nel encierru de San Xosé de Xixón en setiembre del añu 1971.

Nos años 1981 y 1982 foi presidente de la Sociedá Cultural Asturianista “Conceyu bable”, y del 1978-80 foi presidente de la recién creada Asociación de Vecinos “Severo Ochoa” de Pumarín (Xixón), güérfanu de servicios de toa mena. En 1988, a pitición de Chema Valdés y Cice Velasco, pronunció’l pregón de les fiestes de los Güevos Pintos en Sama, na Casa de Cultura de les Escueles Dorado.

En 1993 la Comisión del Concurso Nacional d’Entibadores Mineros d’España, al cumplise’l 50 aniversariu de la so creación, y previa pitición de permisu al autor, llantó nel Parque Dorado delantre de la figura del mineru una placa de bronce colos cuatro primeros versos d’un sonetu que Mánfer de la Llera dedicare nun llibru suyu a los entibadores mineros. Escritor billingüe de sentir popular, Mánfer siempre tuvo más inclináu al cultivu del asturianu, llingua na qu’escribió “Cuentos en versu asturianu” (1953), “Garrapiellu lliterariu asturianu, cuentos y poemes” (1983) y “Cabalgando sol tiempu”, poesía (1991), siendo tamién coautor, xunto col so fíu Ramón d’Andrés, del “Vocabulariu asturianu de la mina” (1997).

El so postrer llibru, “Coses vivíes” de relatos autobiográficos salió a la lluz nos caberos díes d’avientu de 1998.

En castellano publicó “Cosas de la mina” (1952) “Cielo bajo tierra”, (1982) prosa y versos de la mina.

En xunetu de 1991 y n’edición esclusivamente familiar, escribió un llibru de 40 páxines con versos dedicaos a la so muyer Celia Díaz Madariaga, fallecida’l 25 de xineru del mesmu añu.

Nun se punxo a la venta.

Tán pendientes de publicación “La mio prosa atada en versos”, editorial Ámbitu, y “Poesía desatada”, ediciones Trabe, Uviéu. Mánfer de la Llera ye miembru correspondiente de l’Academia de la Llingua Asturiana dende la so fundación y creación en 1981.

Nos años 70 y 80 foi l’encargáu de coordinar les páxines n’asturiano qu’edita’l diariu “El Comercio” de Xixón baxo’l títulu “Alitar Asturies”.

Amás de lo mencionao tien un extensu llabor como cronista na prensa d’Asturies y collaboraciones en porfolios lliterarios de diverses fiestes locales, ente los que destaca l’álbum de fiestes de Sama de Llangréu, nel que vien collaborando darréu dende va cuasi mediu sieglu.

Tamién publicó nes publicaciones d’empresa tales como “La Mina” en Llieres (Siero) y nel “Boletín de Carbones de La Nueva” (Llangréu).

Asina mesmo escribió dalgunos artículos sociales y llaborales en publicaciones progresistes como “Cuadernos para el Diálogo” y la revista “Asturias semanal”. Nel deceniu de 1972 a 1982 algamó doce premios lliterarios, de narraciones y poesía, en diversos concursos convocaos por asociaciones y entidaes culturales, periódicos y institutos. Últimamente, el 3 d’ochobre de 2001 gana col poema “El silenciu de la mina” el tercer premiu del Concursu de Poesía “Asturmayor”, celebráu nel Auditoriu Príncipe Felipe, d’Uviéu. Mánfer de la Llera figura, -ente otros autores clásicos-n’ “Antología para niños” editada pola conseyería de Cultura y Deportes del Conseyu Rexonal d’Asturies en 1980.

Tamién apaez n’antoloxía titulada “Los poetas y la mina”, ellaborada por Albino Suárez, de Llaviana, en 1995, y na postrera antoloxía d’Antón García en Trabe (1998).

Asina mesmo figura na “Gran enciclopedia asturiana” con dos entraes y na “Enciclopedia catalana”. El Centru asturianu de Madrid concéde-y a Mánfer de la Llera l’ “Urogallu de bronce” pola so trayeutoria a favor de la llingua asturiana, galardón que-y entregaron el día 9 d’agostu de 1999 nun actu cellebráu nel salón del anfiteatru de Congresos de la Feria Internacional de Muestres d’Asturies, en Xixón. El 28 de mayu de 1999 el programa “Bravo asturianísimo” del que son patrocinadores el diariu “El Comercio”, Televisión llocal de Xixón y la empresa municipal Teatru Jovellanos, ofreció-y a Mánfer de la Llera un cálidu homenaxe en reconocimientu a la so llarga trayeutoria de llucha na defensa, primero de los xubilaos, depués na defensa de los intereses del barriu de Pumarín (Xixón) al empar qu’escribía, publicaba y defendía la Llingua Asturiana. El 22 d’abril del 2001 nun actu cellebráu nel Muséu de la Minería (L’Entregu) Mánfer de la Llera, pela cuenca del Nalón y César G. Rubín pela del Caudal, recibieron dambos un homenax por parte del Colectivu d’Escritores convocaos por “Grucomi” nel Primer alcuentru d’Escritores de la mina, reconociendo a dambos los méritos acreditaos durante una granible trayectoria d’entrega a la mina y a la so hestoria y a la so lliteratura. El 23 de xunu del 2001 l’ayuntamientu de Llangréu distinguió a Mánfer de La Llera dándo-y el so nome a l’antigua cai de la Llera (nome que garrara’l poeta pal apellíu del seudónimu) que dende entós pasó a llamase Calle Poeta Mánfer de la Llera.

<< Listáu de Autores

<< Tornar al Entamu


El Personaxe
01 de xineru de 2008
Carlos Rubiera va abrir la Xunta d'Escritores 2008

L'escritor asturianu Carlos Rubiera abrirá la Xunta d'escritores Asturianos Uviéu 2008 esti próximu miércoles 2 de xineru con una conferencia sobre'l compromisu del escritor asturianu más p'allá de lo estético. L'actu tendrá llugar na Biblioteca del Campu San Francisco a partir de les 5'30 la tarde, llueu de la presentación del llibru d'Actes de la Xunta de 2005. Carlos Rubiera Tuya nació’l 2 de febreru de de 1956 en Cabueñes (Xixón) anque al pocu tiempu la familia treslladose a Garvelles, na parroquia xixonesa de Caldones, onde sigue residiendo anguaño. Tres d’estudiar Maxisteriu na Universidá d'Uviéu y Música nos conservatorios d'Uviéu y Xixón, dedicóse profesionalmente a la enseñanza. Anguaño ye profesor de Música y Asturianu nel colexu El Bosquín de L'Entregu. Carlos Rubiera destaca pol so llabor na difusión de la llingua asturiana, non solo como cantante y escritor, sinón tamién como responsable de les clases de bable na Universidá Popular, o presentador de programes nel centru territorial de Televisión Española y na emisora Radio Mar de Xixón. Yá dende mediaos de los años setenta apaez vinculáu a les actividaes de Conceyu Bable de Xixón y collabora na sección en Alitar Asturies del diariu El Comercio. Dellos años más tarde foi ún de los primeros miembros de númberu de l’Academia de la Llingua Asturiana.


Fuente: Redacción.

Lleer más >>


Col sofitu de la Conseyería de Cultura, Comunicación Social y Turismu
© 2004 LLITERATU.com -
  |  Publicidá  |  Condiciones d'Usu  |  Información d'Empresa  |  Contacte con nós  |