LLITERATU PORTADA
LA CITA: "El paisaxe ordena los sos tamaños y les sos distancies acordies cola nuestra retina, y el nuestru corazón reparte los acentos." Ortega y Gasset
Accesu Rápidu
EDICIÓN 14
26 d'ochobre de 2007
II Conceyu Internacional de Lliteratura Asturiana
Autores Asturianos
Cabal-Rubiera Iglesias, Constantino
Biografía

Alias :  Constantino Cabal / Triquitraque / Ludeamaro / Eneas
Nacimientu:  16-V-1887 - Uviéu / Oviedo
Defunción:  1967 - Uviéu / Oviedo

Naz n’Uviéu’l 16 de mayu de 1877.

Fai los sos estudios primarios na escuela de don Juan Muñiz, que bien pronto lu diba ocupar nel llabor docente; al empar cursó tamién estudios nel Seminariu uvieín, cubriendo les sos matrícules coles d’honor que sacaba nos esámenes.

Naz a la vida periodística de la mano de Maximiliano Arboleya, que dirixía “El Zurriago Social”, publicación artística y combativa; acordies col periódicu escribió les “Odas despampanantes”, qu’apaecieron firmaes col seudónimu de “Ludeamaro”.

Nel añu 1900 ingresó na redacción del diariu uvieín “El Carbayón” y popularizó nes sos páxines, amás del yá indicáu, el seudónimu “Triquitraque” qu’utilizaba en trabayos humorísticos.

Desta (1904-1905) apaez nel diariu al que pertenecía la so primer obra estensa “Psiquis” y foi espublizada otra col títulu “Las memorias de un enfermo” (Uviéu, 1904).

A finales de 1905 marchó pa La Habana; ellí foi presentáu pol presidente del Centru Asturianu, Juan Bances Conde, al periodista villaviciosín Nicolás Rivero, director del “Diario de la Marina”, redacción de la que diba tomar parte.

Desendolcó dempués dellos cargos, espublizó poemes, crítiques de llibros de teatru y reportaxes.

Al morrer Curros Enríquez, ocupóse de la sección qu’esti llevaba sobre la vida y la política española.

Firmaba los sos escritos col seudónimu “Eneas”, el mesmu del que se servía otru gran poeta tradicionalista de la época, Benjamín Bolaños.

Sol seudónimu d’Eneas, qu’utilizaba col permisu de Bolaños, llevó a cabu campañes de muncha polémica en defensa de los intereses morales y materiales d’España en Cuba, y el so ésitu periodísticu llévalu a ser l’español de más sonadía na islla antillana.

Una sellección de los sos poemes foi publicada baxo’l títulu “Del Amor”, en 1907.

Nesti mesmu añu contrái matrimoniu cola poetisa Mercedes Valero Valdés.

La campaña al rodiu de les práctiques de bruxería, a cuentu del asesinatu de dos neños en ceremonies rituales de fechicería, fai que’l “Diario de la marina” se ponga de venta directa nes cais, abandonando’l procesu de venta per suscripción que venía siendo l’habitual.

Ye nomáu corresponsal del periódicu en Madrid onde vien en 1910.

Al empar, trabaya davezu nel Archivu Históricu, na Biblioteca Nacional y na Real Academia de la Historia; visita tamién con frecuencia los archivos de Simancas, d’El Escorial, de les catedrales d’Uviéu y de Compostela.

En 1914 pasa dalgunos meses en La Habana, onde escribe’l drama asturianu “Los osos” nel qu’emplegó, por una apuesta ente compañeros, menos d’una selmana.

Foi estrenada la obra al añu viniente nel Teatro de la Comedia de Madrid, por una de les meyores compañíes españoles, la del nomáu comediante Enrique Borrás.

Col mesmu gran ésitu foi presentada nel Teatro Campoamor d’Uviéu.

Cásique tola segunda decena del sieglu dedicóla Cabal a la erudición histórica.

Los sos conocimientos del llatín paleográficu permitiéronlu penetrar nes fuentes de la Edá Media asturiana; pronto los sos llibros sobre Asturies van ser importantes y comentaos por Ramón Menéndez Pidal, Antonio Ballesteros Beretta y Claudio Sánchez Albornoz; acordies con Menéndez Pidal poseía una “intuición d’historiador”; poro, la obra de so tien un importante llugar na historiografía asturiana.

El so primer llibru sobre esta materia foi “Covadonga” (Madrid, 1918; 2ª edición en 1924) na conmemoración del duodécimu centenariu de la batalla.

Al añu siguiente publicó’l llibru de “Libro de cómo se hacen todas las cosas”, confidencies de les figures lliteraries y artístiques más famoses de tou aquel tiempu: Palacio Valdés, Pardo Bazán, Jacinto Benavente, Ramón Menéndez Pidal, etc.); estrena “La presa de las águilas” y “Majestad” (esta pola compañía de Conchita Torres), publicaes en Madrid en 1924 y escribe “La sementera de la sal” (s.

a.) y “Capitán de romancero” qu’editaría años dempués (1949), “Llama de Lar” y la “Hora del Yunque” (s.

a.).

El teatru de Cabal en versu correspuende al estilu nuevu del drama de capa y espada que tuvo tantu ésitu na primer metada del sieglu XX coles obres de Marquina y Villaespesa ente otros.

Llamáu a La Habana pa qu’ocupase’l cargu de subdirector del “Diario de la Marina”, nun-y petez abandonar España y, sobre manera, la so querida Asturies, a la que venía davezu dende Madrid.

Asina, pa poder vivir n’España y trabayar n’Asturies acepta la dirección en 1925 del periódicu de tendencia católica “Región”, d’Uviéu, cargu que-y pertenez hasta la seronda de 1928 en que marcha pa ocupar la dirección del periódicu “El Día de Palencia” durante dalgún tiempu; al cesar nesti torna pa Uviéu y ye nomáu Cronista d’Asturies y director de la biblioteca provincial d’Asturies.

Pa enanchar esta última fai un llamamientu a tolos asturianos y amantes de la rexón encamentándo-yos que donaren llibros a la institución; entamen a llega-y milenta llibros, y cuando los sos planes diben facese realidá, ye destituíu cola llegada de la Segunda República.

En 1937 torna pa La Habana y pa la redacción del “Diario de la Marina”.

N’España los sos artículos diben siguir siendo mui comentaos y difundíos pola prensa de fala hispana.

Al finar la Guerra Civil foi nomáu Periodista d’Honor y yá de vieyu recupera’l cargu de Cronista d’Asturies.

Cuando se crea l’Intitutu d’Estudios Asturianos intervién directamente nel mesmu en calidá de miembru de númberu y de director del so boletín.

Participa nos actos culturales que se cellebren con cuenta del mil cientu aniversariu d’Alfonso Segundu’l Castu y continúa’l llabor d’investigador, folclorista y escritor en castellán y n’asturianu.

En 1964 concéden-y la Cruz de la Victoria que-y diba ser entregada nun actu académicu al qu’asistieron toles Corporaciones y personalidaes intelectuales asturianes y una representación del CSIC. Con tal motivu rindiéron-y dellos homenaxes y l’IDEA dedicó-y el númberu 63 del so boletín.

Perteneció como miembru correspondiente a les Reales Academies de la Historia y Belles Artes y taba en posesión de la Gran Cruz d’Alfonso X el Sabiu.

<< Listáu de Autores

<< Tornar al Entamu



Poemes
¿ú?
26 d'ochobre de 2007
Unviáu por: Xabel de Cea
Lleer poema >> << Participar >>
Ensin títulu
26 d'ochobre de 2007
Unviáu por: Xabel de Cea
Lleer poema >> << Participar >>
Col sofitu de la Conseyería de Cultura, Comunicación Social y Turismu
© 2004 LLITERATU.com -
  |  Publicidá  |  Condiciones d'Usu  |  Información d'Empresa  |  Contacte con nós  |