LLITERATU PORTADA
LA CITA: "Nun sé, pero a vegaes siéntome / perdíu na nueche de la to ausencia, / y quéxome nel fríu y el mieu / a los murios tan ñegros de nun vete." Pablo Ardisana
Accesu Rápidu
EDICIÓN 13
05 de payares de 2007
Novedaes lliteraries del añu 2007
Autores Asturianos
Bances Candamo, Francisco Antonio de
Biografía

Alias :  Francisco de Bances
Nacimientu:  166? - Sabugo (Avilés)
Defunción:  1709 ? - Lezuza (Albacete)

Francisco Antonio de Bances y López-Candamo foi poeta, dramaturgu y autor, destamiente, de temes de mena estremada (bibliofilia, historia del teatru, etc.) con una obra en gran parte perdía.

Acordies coles sos propies pallabres defínese como de noble cuna pelos cuatro costaos y empondera los primeros llinaxes de so rellacionando a un Bances col Sultán Saladino y la toma de Xerusalén.

Naz en Sabugo (Avilés) el 26 d’abril de 1662 anque dalgunos biógrafos ponen en dubia esa data.

Naz nel noyu d’una familia perprobe, como costa na partida de defunción del pá “xastre probe”, que muerre cuando Francisco Bances tien once meses.

De siguío so ma va vese na necesidá de confia-ylu al so hermanu, Antonio López Candamo, callóndrigu de la Catedral de Sevilla.

En 1672, cuando contaba con diez años, va recibir les órdenes menores dempués de cursar los estudios necesarios.

De creer al propiu Bances Candamo, siguiría estudiando hasta doctorase en Sagrados Cánones, y magar que nun se tenga perclaro qu’estudiare, sicasí, la formación hubo de ser bona, y ello queda de manifiestu polo curiosu que yera pa desendolcar el so llabor nos cargos públicos.Cuando llega a Madrid en 1680 yá garra fama de poeta en romance y en llatín.

Acordies cola descrición que fai d’él Río Marín, yera guapu, altu, forníu, de cara reonda, de barba prieta, agradable nel tratu…Bien llueu goza del favor y de la proteción de dalgunos grandes de la Corte y del propiu rei Carlos II, qu’en 1685 entama a encarga-y a Bances Candamo, designáu oficialmente como poeta áulicu, testos pa les comedies, autos, lloes que se representaben davezu con ocasión de feches señalaes.

Mesonero Romanos damos cuenta de la fama que garrare Bances al poco de llegar a Madrid.

Recibe una mancadura en pechu, acordies con unos por cuenta d’una aventura amorosa, acordies con otru por revenga d’una sátira personal,y desta, cuando ta malu nun solo va a casa d’él a visitalu tola nobleza, sinón que’l propiu Rei entrugaba por él cada día, mandába-y los propios ciruxanos y llegó a prohibir el pasu de carros y a enllenar d’arena’l suelu pa que nun s’oyera’l ruíu en ficies de que naide nun lu molestare.

En 1683 va recibir mil ducados en conceutu de gastos secretos.

Los años vinientes van tar enllenos d’obres que componía pal teatru del Buen Retiro onde alternaben les obres de Calderón –postumes o repuestes- y d´otros autores daquella.

Al empar qu’escribía estes obres diba teorizando al rodiu del teatru y de la historia teatral en “Theatro de los theatros”, costituyendo ún de los primeros documentos que cinquen a la polémica sobre la moralidá del fechu teatral, discutiniu que diba allargase per tol sieglu XVIII. Nos caberos años de la so vida diba desendolcar dellos encargos oficiales.

Abandona la Corte en 1694 cuando yera de sonadía conocíu como autor teatral y poeta, quiciabes por cuenta del ambiente abegosu qu’había na Corte, anque seique fore meyor creer que lo facía por mor de ganar puntos pa que dempués fore recompensáu con un puestu estable en Madrid.

De mano foi nomáu alministrador de rentes de Cabra, y de siguío, nel mesmu añu de 1694, visitador xeneral d’alcábales de Córdoba, Sevilla, Málaga, Xerez, Sanlúcar, Xibraltar y Ronda, cargu que desendolcó con eficacia y honradez, teniendo que dir incluso a Ceuta p’abastecer de provisiones la plaza que taba arrodiada poles tropes del rei de Mequínez.

En 1697 foi nomáu alministrador de les Rentes Reales d’Ocaña y la rebolada.

Revóca-y Facienda’l nomamientu, quedando Bances cesante y tien d’intervenir el propiu rei que-y encomienda les superintendencies de Cuenca, Úbeda (1699) y Baeza (1700) onde tien noticia de la muerte del rei Carlos II. Ocupó’l mesmu cargu en San Clemente de Cuenca (1702), y a la fin ye mandáu en calidá de xuez inquisidor a Lezuza (Albacete) onde garra una enfermedá que lu consume, morriendo’l 8 de setiembre de 1704 n’aquella villa.

<< Listáu de Autores

<< Tornar al Entamu


El Personaxe
05 de payares de 2007
XIX SELMANA DE LES LLETRES ASTURIANES
Consuelo Vega, Directora Xeneral de Cultura y Política Llingüística, dio anuncia estes selmanes atrás de la tema de la próxima Selmana de les Lletres Asturianes, la festividá institucional de les nueses lletres, que vuelve cola alcordanza y l’estudiu de la obra d'un autor, nesti casu, de la escritora Mª Teresa González. A la que dedicamos un pequeñu repás biográficu.
Fuente: Redacción.

Lleer más >>


Col sofitu de la Conseyería de Cultura, Comunicación Social y Turismu
© 2004 LLITERATU.com -
  |  Publicidá  |  Condiciones d'Usu  |  Información d'Empresa  |  Contacte con nós  |