LLITERATU PORTADA
LA CITA: "El futuru tortúranos y el pasáu encadénanos. Por eso ta escapándosenos el presente". Gustav Flaubert
Accesu Rápidu
EDICIÓN 11
18 d'ochobre de 2007
Asturies de premiu
Autores Asturianos
Campillo y Cosío, José del
Biografía

Alias :  José del Campillo y Cossío
Nacimientu:  6-I-1692 - Alles (Peñamellera Alta)
Defunción:  1743 - ?

Ye natural d’Alles, conceyu de Peñamellera, onde naz el 6 de xineru de 1692, nuna familia de nobles anque non mui ricos.

Entama a estudiar de propia voluntá y a edá temprana gramática y llatín.

En 1708, tres la muerte de so pá, marcha pa Córdoba, onde entra al serviciu como paxe del callóndrigu y escritor Antonio Maldonado, que, pescudando lo finu que yera pa estudiar, quítalu de sirvir y ponlu a estudiar nel colexu de San Pelayo, onde estudia filosofía y teoloxía.

A fines de 1713, como nun pensaba dedicase a la carrera eclesiástica, como camentara’l callóndrigu, dexa la casa d’esti y entra a servir de paxe a Francisco d’Ocio, intendente xeneral d’Aduana, na mesma ciudá de Córdoba.

Esti nuevu xefe diba ponelu bien ceo na secretaría.

En 1717 marcha, al treslladase’l so xefe, a Madrid, onde va siguir la carrera alministrativa de la Marina de Guerra, na que s’inició so la proteición del sucesor de Cossío.

De funcionariu yá desendolcó servicios con aciertu en Sevilla, Santoña y Guarnizo (Santander).

Destináu en Guarnizu, la tirria d’un soalternu suyu, Zenón de Somodevilla, dempués Marqués de la Ensenada, va facer que lu procese la Inquisición en Logroño en 1726 acusáu de lleer llibros prohibíos, de tener contautos con herexes, opiniones malamañoses y profesar l’ateísmu.

Foi absueltu y nel añu 1728 promovíu a la categoría de comisariu ordenador de Marina, con destín de superintendente na fábrica de Baxeles de Cantabria, siendo secretariu de Marina y Facienda José Patiño.

Poco dempués diben a confiáse-y dellos servicios nos astilleros de La Habana, onde va casar enantes de tornar a España con Leonor Ambudiali y Arriola.

En 1734 ye de nueu ascendíu al se-y confiáu’l cargu d’Intendente del exércitu destináu a Italia, baxo’l mandu del duque de Montemar.

Al finar la campaña en 1737 torna a España y vilbu de la primera esposa, casa con María Benítez de Rozas y Drumond, fía de los duques de Castel Blanco y San Andrés.

Destináu al cargu d’intendente xeneral del exércitu d’Aragón, asitiáu en Zaragoza, fai una serie d’obres de gran utilidá pública, entamando dellos proyectos rexeneradores.

Propunxo facer navegable’l ríu Ebro; la perfección y cursu de l’Acequia Imperial; dar nueva planta a les recaudaciones de rentes; estirpar los abondosos contrabandos qu’había; restablecer fábriques; finar coles estorsiones y estafes que se-yos facíen a los pueblos; iguar caminos y enllanar los puertos d’Used y Retascón.

Rectificó la puente´l Gállego y esplotó una cantera de mármoles que surtíen al Palaciu real, etc.

Por cuenta de la recostrucción de la puente´l Gállego, va tener un encontronazu col arzobispu por nun permitir, a nun ser que pagasen un curtiu derechu temporal, el pasu a caballería o carruax que pasase per él, porque’l presupuestu quedaba curtiu.

Al nun facer exceición coles de los eclesiásticos, l’arzobispu, enrabietáu, va llegar a dictar excomunión escontra l´intendente, anque Campillo va salir bien paráu.Va llegar a combatir Campillo delantre’l rei los proyectos de facienda del ministru Fernando Verdes Montenegro.

Al empar que-y unvía la comisión al rei, va medrando pela reina a la que-y unvía un plan pa recuperar los estaos italianos de Milán, Parma y Florencia, ente otres dispociones.

A la reina lláma-y l’atención esti planteamientu y failu encargáu de la secretaría de Facienda nel añu 1739.

Tando nel Ministeriu ye cuando s’atopa más afayadizu pa escribir trataos no que cinca a la economía y l’alministración pública.

Cuando llega al cimbru de la so actividá creadora muerre en 1743.

<< Listáu de Autores

<< Tornar al Entamu



Relatos
Alcordanza Perra
18 d'ochobre de 2007
Unviáu por: Ricardo Candás
Lleer relatu>> << Participar >>
Col sofitu de la Conseyería de Cultura, Comunicación Social y Turismu
© 2004 LLITERATU.com -
  |  Publicidá  |  Condiciones d'Usu  |  Información d'Empresa  |  Contacte con nós  |