LLITERATU PORTADA
LA CITA: "Siémtome dir polos carreiros verdes / enrechuscaos de fleitos / que van repolleiciendo. / Yá escurecíu / ya nun soi a sabere / cuálas cousas son aquellas / que buscan los caminos." Roberto González-Quevedo
Accesu Rápidu
EDICIÓN 14
26 d'ochobre de 2007
II Conceyu Internacional de Lliteratura Asturiana
Autores Asturianos
Canga Argüelles y Cifuentes, José
Biografía

Alias :  Observador B.
Nacimientu:  1770 - Uviéu / Oviedo ~ Xixón / Gijón
Defunción:  2-XII-1842 - ?

Nació n’Uviéu en 1770.

Estudió Lleis y Cánones na universidá d’Uviéu y doctoróse na de Zaragoza, onde vivió la familia mientres que’l pá perteneció a l’Audiencia d’esta provincia.

Al treslladase otra vegada la familia a Uviéu, José continuó en Zaragoza hasta doctorase y tal vez más tiempu entá, y más tarde pasó a Madrid.

Como la mayoría de los estudiantes d’Humanidaes, nel so tiempu fizo dellos intentos nel campu de la poesía, magar que nun se conozan les sos produciones.

Sí se conocen, por embargu, les traducciones de clásicos griegos, en collaboración col so hermanu Bernabé, que foron el pilpayu de munches traducciones posteriores.

Enanchó los sos estudios económico-sociales, llegando a algamar unos conocimientos poco frecuentes na dómina, que-y abrieron la puerta grande de la política.

Diose a conocer coles sos notes y comentarios sobro “Suplementos al Apéndice de Educación Popular”, de Campomanes, que-y facilitaron la entrada na Real Sociedá Aragonesa, el 25 d’ochobre de 1794.

Añu y mediu dempués, el 5 de febreru de 1796, la sociedá d’Amigos del País de Zaragoza, premiaba’l so trabayu sobro la despoblación del reinu d’Aragón.

El so primer cargu políticu, pal que foi nomáu ´l 3 de xineru de 1798, foi’l de procurador xeneral síndicu pol Estáu Noble de Xixón cargu qu’abandonó aína, tornando a Madrid por ser nomáu, dos meses dempués, oficial na Caxa d’Amortización de Vales Reales, cargu que desendolcó durante cinco años, a lo llargo de los que espublizó dellos trabayos y memories qu’acreditaben la so llaboriosidá y valía y que más tarde recoyó nel so “Diccionario de Hacienda”.

D’ente “Memorias”, destaquen les referentes al Conceyu Económicu Internacional y l’añadida al Reglamentu de la Secretaría de Facienda, coles normes pa la recaudación y alministración de rentes del estáu.

El 8 de xineru de 1800 foi nomáu secretariu de la so maxestá con exerciciu de decretos compatible col d’oficial de Caxa y nesi mesmu añu miembru honorariu de la Sociedá d’Amigos del País de Madrid; al añu siguiente, sociu honorariu de la d’Uviéu y, en 1803, de la de Sanlúcar de Barrameda.

Dexó la Caxa d’Amortización de Vales Reales n’agostu de 1803 pa pasar col mesmu cargu, a la Secretaría d’Estáu, y poco dempués recibió’l nomamientu de criáu de la Casa Real.

N’ochobre de 1804 tomó posesión del cargu de contador nel exércitu de Valencia, onde casó con doña Eulalia Ventades Ventades, circustancia que contribuyó al so arraigu na ciudá llevantina, na que naz el so fíu Felipe.

Cuando llevaba poco más d’un añu de contador, el rei concéde-y el títulu de Caballeru de la Orde de Carlos III y l’Academia de la Historia almitíalu como sociu correspondiente.

En 1806 publicó en Valencia la “Colección de reales cédulas…” y en 1807 la “Recopilación de todas las leyes, ordenanzas y reglamentos del cuerpo político de los Ejércitos de España” en seis tomos.

Al escomencipiar la Guerra de la Independencia (1808) formó parte de la Xunta Suprema de Valencia, de la que recibió un nuevu ascensu’l 28 d’abril de 1809, al ser nomáu intendente del exércitu y reinu de Valencia y Murcia.

Durante la so xestión como miembru de la xunta ya intendente espublizó delles obres qu’aumentaron la so fama como políticu y economista.

En payares de 1810 ye nomáu pola rexencia ministru interín del Estáu (asuntos exteriores) y ministru de Facienda.

Al facer esti nomamientu los rexentes pensaron nel home con conocimientos ya iniciatives amañoses pa organizar y alministrar el tesoru públicu, cásique en bancarrota de nun tar en bancarrota mesmo por mor de los abondosos gastos qu’ocasionaba la guerra.

Canga Argüelles aportó a la islla de Lleón (Cádiz) residencia de les Cortes a mediaos de xineru de 1811.

Desendolcó’l cargu namái qu’hasta entamos d’agostu del mesmu añu, magar que durante esi tiempu desendolcare una actividá daveres estraordinaria qu’amosoaba la so llaboriosidá y competencia: memories sobro arbitrios estraordinarios pa sostener la guerra, sobro’l so repartu y cobro, sobro l’estáu de les provincies, los gastos y les rentes, sobro la cesión de los presidios menores d’África a Marruecos, y cambiu de trigu y carnes, sobro’l mediu d’aprovechar pal erariu, les xoyes de les ilesies ensin qu’estes se desprendieren d’elles, sobro la renta del tabacu y rentes y gastos de la Corona.

Hai qu’añader a esto’l proyeutu de presupuestu nacional que se facía n’España por primer vegada y que mereció la emponderación de les Cortes.

Dempués de cesar como ministru rexentó varios puestos: encargáu d’Indies, superintendente xeneral de Facienda, intendente de los exércitos segundu y terceru ya intendente del reinu de Valencia.

A finales de 1812 foi nomáu gobernador de Soria, cargu que dexó en setiembre de 1813 al ser ellexíu diputáu por Asturies pa les Cortes Ordinaries.

Volvió a Cádiz a ocupar el so escañu nel parlamentu, dende onde intervieno en varios debates de calter económicu y amosóse lliberal.

Desendolcada la reacción absolutista qu’entamó col famosu decretu firmáu por Fernando VII en Valencia’l 4 de mayu de 1814, Canga Argüelles, lo mesmo que tantos otros diputaos lliberales que nun tuvieren tiempu o que nun quixeren colar, foi encarceláu.

Condenáronlu a ocho años de prisión nel castiellu de Peñíscola, n’onde permaneció hasta’l trunfu del movimientu lliberal entamáu por otru asturianu lliberal, Riego.

Demientres taba presu dedicóse a los sos estudios preferíos y a la redacción d’un manifiestu nel que ponía a les clares la so conducta política.

La sonadía del facendista asturianu trespasare les fronteres y, mentres que’l propiu rei-y agradecía los servicios teniéndolu presu, otru rei, el francés y tamién Borbón, concedía-y la Flor de Lis polos servicios emprestaos a los Borbones, el 23 d’abril de 1816 –destamiente diba premiar tamién a dalgún otru lliberal refuxáu en Francia daquella.

Col trunfu del movimientu lliberal y la costitución de 1820, Canga Argüelles entra nél como ministru d’Estáu y del despachu de Facienda, siendo nomáu, al poco, conseyeru d’Estáu; en payares d’esi mesmu añu la Sociedá d’amigos del País nomólu miembru de la mesma.

Al facese cargu del so departamentu, atopó l’erariu públicu na mesma o en peor situación que en 1811, la primer vez.

Nuno de los sos escritos diba poner de manifiestu’l caos esistente por cuenta de que los gastos doblaben los ingresos.

Malpenes nel añu que duró’l so mandatu, llaráu d’amarres políticos, nun pudo realizar les reformes que yá tenía estudiaes, por falta de tiempu y de reposu.

Comunicó a les Cortes, por embargu, la perllaceriosa situación de que los bienes del clero foren un terciu mayores que los del Estáu, y propuso la venta de delles propiedaes eclesiástiques.

Cayó del poder col Gobiernu del que formaba parte, el 2 de marzu de 1821, pola famosa “coletilla” de Fernando VII al discursu de la Corona na apertura de les Cortes.

Ellexíu diputáu a Cortes, manifestóse decidíu lliberal magar que moderáu, interviniendo nos debates, sobre manera en cuestiones facendístiques, al empar qu’espublizaba dellos trabayos sobro la materia.

Foi ún de los diputaos que suscribieron la protesta del Gobiernu presidíu por Evaristo San Miguel escontra la intromisión de les potencies de la Santa Alianza nos asuntos internos d’España.

Al trunfar la reacción absolutista afitada nos exércitos foriatos, Canga Argüelles escapa pal estranxeru refuxándose n’Inglaterra.

N’aquela perbayurosa migración salieron tamién d’España otros perconocíos asturianos: Argüelles, Toreno, Flórez Estrada, etc.

Nesa temporada va dedicase a ampliar conocimientos y a escribir en dellos periódicos, como “Ocios de españoles emigrados”; foi ispirador y redactor d’“El Emigrado Observador”, nel que se puen atopar munches noticies sobro los illustraos.

Entama la vuelta de Canga Argüelles hacia la drecha col envís de que les autoridaes españoles-y permitieren la repatriación, asuntu que va ser enforma criticáu polos demás illustraos.

Nel últimu númberu d’esi periódicu dase anuncia de que va empezar a espublizase otru periódicu ensin dalu cariz políticu: “Seminario de Agricultura y Artes” qu’entamó a publicase’l dos de xunetu de 1829, continuando la edición una vegada yá repatriáu en Sevilla y dempués en Madrid.

La so principal actividá durante l’esiliu fore la investigación histórico-economista, espeyada nes once obres que redactó entre 1825 y1831.

Dempués de la repatriación y de la muerte de Fernando VII, los sos cargos y destinos foron munchos y estremaos, magar que nun intervieno directamente nes lluches polítiques.

En xineru de 1834 encamentáron-y recopilar les lleis de Propios y escribir los elementos de la Ciencia de l’Alministración.

En marzu del mesmu añu foi nomáu visitador del Istitutu Xovellanos, cargu que desendolcó hasta 1839, lo que-y permitió vivir parte de los últimos años na villa pa la que xestionó la istalación de la fábrica de tabacos.

En 1835, amás de los cargos anteriores y de ser restitutíu como conseyeru d’Estáu foi comisariu rexu nes xuntes xenerales de los gremios, miembru de la Xunta Superior de Sanidá, miembru de la Comisión consultiva pal reconocimientu de la Independencia americana ya istructor de los comisionaos sobro la navegación de Dueru.

En 1836 nomóselu miembru de la Comisión pal arreglu del Conseyu Real, informador sobro la pertenencia de los bienes escurialenses al patrimoniu de la Corona; en 1837 presidente de la comisión pal arreglu de los ayuntamientos y diputaciones; en 1838, vicepresidente de la Xunta Suprema de Sanidá, visitador de colexos d’escolapios, miembru de la Comisión pa entender nes reclamaciones patrimoniales de la Corona; en 1839 presidente de la Comisión d’Aranceles, conseyeru de les contrates de suministros al exércitu, etc.

Foi académicu de la hestoria dende 1835, sociu de méritu de la Sociedá Económica Xixonesa dende 1834 y Gran Cruz de Carlos III dende 1837.

Los cargos siguieron honrándolu hasta’l día de la so muerte’l 2 d’avientu de 1842.

Diez años dempués de la so muerte Isabel II concéde-y a títulu póstumu’l títulu de Conde de Canga-Argüelles.

<< Listáu de Autores

<< Tornar al Entamu


Relatos
Toblerone
26 d'ochobre de 2007
Unviáu por: Pablo X. Suárez
Lleer relatu>> << Participar >>

El Reportaxe
26 d'ochobre de 2007
Un averamientu a la hestoria del cómic n'asturianu

Dientro del II Congresu de Lliteratura Asturiana de l'Academia de la Llingua Asturiana va celebrase una conferencia de Chechu García y Próspero N. García, que va percorrer la hestoria del cómic en llingua asturiana. Ufiertamos equí un resume de Chechu García sobre la hestoria d'esti xéneru que lleva un tiempu estudiando a fondu.


Chechu García/Redacción.

Lleer más >>

Col sofitu de la Conseyería de Cultura, Comunicación Social y Turismu
© 2004 LLITERATU.com -
  |  Publicidá  |  Condiciones d'Usu  |  Información d'Empresa  |  Contacte con nós  |