LLITERATU PORTADA
LA CITA: "Tu yes la mio lluz tenebrosa. / Tu que la mano me das / hacia l'orixe viviente / de la mio soledá." Leopoldo Panero
Accesu Rápidu
EDICIÓN 14
26 d'ochobre de 2007
II Conceyu Internacional de Lliteratura Asturiana
Autores Asturianos
Carrió y Lavandera, Alonso de
Biografía

Alias :  Concolorcorvo
Nacimientu:  1706 - 1716 - Xixón / Gijón
Defunción:  17-I-1783 - Perú

Naz en Xixón pente los años 1706 a 1716, fíu de Justo Carrió de Lavandera.

Sal de Xixón a l’aventura d’América y dempués de medrar en México y en Perú de comerciante, ocupó cargos concedíos pol virrei Manuel de Amat de quien foi home de confianza.

Por encargu d’esti viaxó dende Perú hasta Cádiz en 1767 al quite de 200 xesuites espulsos por Carlos III y con cuenta d’esto aporta a Madrid, onde consigue, quiciabes por influencia de Campomanes que se lu nome el 12 de xineru de 1771 visitador de los correos y les estafetes del Virreinatu del Perú, dende Montevideo hasta Lima.

Un mes más tarde salió d’España rumbo a América, redactando d’esta travesía un “Extracto…” del viaxe que fizo a Tucumán, dende A Coruña hasta’l puertu de Montevideo.

Aprovechó tamién el viaxe pa exercer como comerciante, pues dende A Coruña conseñó pa Buenos Aires una importante cantidá de lloza d’Holanda, cristalería y vidrios.

Nesti añu de 1771 apaez fecháu en Madrid el so primer llibru “Lazarillo de viajeros…” que se diz que foi impresu en Xixón, pero que, por cuenta de que daquella nun había imprenta dala ellí supónse editáu en Madrid; y como nun se conocía entá nengún exemplar de tala obra fizo destamiente sospechar de la so esistencia y confundilu cola segunda: “El Lazarillo de ciegos caminantes…”, sacáu de les memories d’Alonso Carrió por Calixto Bustamante Carlos Inca, alias Concolorcorvo, natural de Cuzco, lo qu’orixinó una serie de polémiques en tornu a ver quién yera’l verdaderu autor del llibru hasta qu’en 1956 Real Díaz espubliza una carta y manuscritos de Carrió descubriendo’l motivu d’escondese nesi seudónimu y de falsear el llugar d’imprensión de la obra, qu’apaez fechada en Xixón en 1773 de la que nun esistía tampoco imprenta na ciudá.

Les animaes y vives descripciones que apaecen del gauchu y del so escenariu, xuncío a la rareza de la so edición príncipe, fízolu algamar prestixu nel Río de la Plata, convirtiendo al llibru y autor nuna de les referencies más prestoses de la lliteratura virreinal.

Carrió escondió aquellos datos pa evitar los regalos d’exemplares y encubrir la inmodestia de ser él mesmu quien diere a conocer les reformes que como visitador ficiere él mesmu nel serviciu de correos, desvirtuando al empar lo dañible de la envidia que-y tenía l’alministrador xeneral del virreinatu al ver qu’en Madrid teníen más en cuenta los proyectos de Carrió que los d’aquelli.

Por estos fechos y reformes Carrió fa-y frente al alministrador, intentando imprimir un cartafueyu que foi incautáu por vía xudicial, y magar que se resolviera ensel, por ser asuntu de gobiernu, por Floridablana, dándo-y una paga a Carrió, foi tema d’escándalu.

Casó Carrió en Lima, y tuvo una fía.

Nun tuvo malapenes nenguna otra apaición na vida pública a nun ser en 1782 cuando redacta un plan económicu pal Perú.

Muerre’l 17 de xineru de 1783 nesa capital.

<< Listáu de Autores

<< Tornar al Entamu


Relatos
Toblerone
26 d'ochobre de 2007
Unviáu por: Pablo X. Suárez
Lleer relatu>> << Participar >>

El Personaxe
26 d'ochobre de 2007
ANA CANO: La Presidenta de l'Academia de la Llingua Asturiana
Ana María Cano González ñació’l 12 de mayu de 1950 en Vil.larín, nel conceyu de Somiedu. Ye mayestra d’Enseñanza Primario, llicenciada en Filosofía y Lletres pola Universidá d’Uviéu (1972) y, dende 1975, doctora en Filosofía y Lletres (seición de Filoloxía Románica) con sobresaliente cum laudem.
Fuente: Lliteratu/I.G.

Lleer más >>

Col sofitu de la Conseyería de Cultura, Comunicación Social y Turismu
© 2004 LLITERATU.com -
  |  Publicidá  |  Condiciones d'Usu  |  Información d'Empresa  |  Contacte con nós  |