LLITERATU PORTADA
LA CITA: "Llueve. Imaxe masuñada hasta l’aburrimientu. / Detrás de la ventana llueve / y la ciudá apártase si acesmo. / Agora yo tamién sé qué manera tien l’hibiernu / d’imponer el so dominiu." Berta Piñán
Accesu Rápidu
EDICIÓN 14
26 d'ochobre de 2007
II Conceyu Internacional de Lliteratura Asturiana
Autores Asturianos
Ceán Bermúdez, Juan Agustín
Biografía

Alias :  Bermudo
Nacimientu:  17-IX-1749 - La Pola / Pola de Siero (Siero)
Defunción:  3-XII-1829 - Madrid

Ye ún de los asturianos más illustres de tolos tiempos y quiciabes ún de los más desconocíos por cuenta de que la so obra nun trasciende al gran públicu.

Ye una figura que tien d’emparentase estrenchamente cola de Xovellanos, que-y fizo solombra en tolos momentos.

Naz nel conceyu de Xixón, en Xove’l 17 de setiembre de 1749, nel llar d’una familia modesta.

Los Ceán-Bermúdez yeren d’otres tierres y asitiénse equí siendo ún d’ellos Juan Agustín, güelu y padrín del biografiáu, de profesión escribanu y tenía un mesón na cai Corrida.

Les coses nun van bien pa Juan Francisco que, cola ayuda del escribanu, istálase como mercader.

El güelu tien bonos amigos, y en vista de que’l rapaz yera trabayador, decídese que pase a Uviéu, al colexu de los xesuites.

De mozu, los pas yá nun son a costea-y los gastos d’estudios superiores.

El güelu, conocedor de los Xovellanos, píde-yos que-y echen un gabitu.

Asina, recibe la nueva de que va ser paxe de don Gaspar, que yá recibiere en Burgos de Osma’l grau de bachiller de Lleis en 1761, y, n’Ávila, na Universidá de Santu Tomás, el de Llicenciáu, Doctor y Maestru en Cánones en 1763.

En 1766 yá tán los dos n’Alcalá de Henares.

A finales de 1767, Xovellanos cambia de destín, por real despachu de Carlos III de 31 d’ochobre de 1767, algamando’l nomamientu d’Alcalde de Crime de l’Audiencia de Sevilla.

El 18 de marzu de 1768 emprenden xuntos la marcha y lleguen el 28 d’esi mes.

A la par qu’en Xovellanos esconsoñen los pruyimientos poéticos, en Ceán faénlo los pictóricos, lo que lu va llevar a recibir clases de Juan de Espinal.

Ellí prueba’l so enclín pa coles artes.

Son estos unos años de munchu llabor poéticu y de munches rellaciones artístico-lliteraries que lu alcen dientro del conciertu patriu de los homes significativos d’un nuevu estáu de coses.

Diez años dempués, n’agosto de 1778, Xovellanos recibe’l nomamientu d’Alcalde de Casa y Corte de Carlos III. Lleguen a Madrid el 13 d’ochobre y alluguen la residencia na Plazuela del Gato.

Ye a partir d’esi día y añu cuando Xovellanos entama los contactos a de toa triba, ente ellos los qu’establez col pintor de Cámara Antonio Rafael Mengs, a quien-y espón qu’abellugue sol so patrociniu a Ceán, que foi discípulu de so ente la última selmana d’ochobre de 1778 y la primer de 1779.

De la Plazuela del Gato pasen a la carrera de San Jerónimo.

Y asisten a la tertulia d’otru asturianu, el “Conde de Campomanes”, qu’acordies colo que diz Ceán Bermúdez concurríen a ella los principales sabios de la corte.

Ellí conoz a Francisco Cabarrús, ocho años más mozu qu’él.

Cabarrús va camín de ser figura importante y, a pitición de Xovellanos, almite a Juan Agustín a les sos órdenes pa que cuerra la mesma suerte que’l so destín.

Son años de dir al debalu per toles ciudaes principales d’España, esperiencies de les que va dir tomando datos pa les sos obres especializaes y vaya faciéndose con dibuxos, cuadros y bocetos que diben dir a parar al Istitutu de Xixón tiempu dempués.

Dotramiente aquel destín de so algama carta de naturaleza cuando a Cabarrús-y encamienten l’establecimientu del Bancu de San Carlos en 2 de xunu de 1782.

Ceán sigue al llau del so mentor ya incorporáu por primer vez a un cargu públicu, y al poco en xuntura con Xovellanos, treslládase a una nueva casa na cai Juanelo qu’él mesmu encarga decorar.

La so actitú va ser premiada con un ascensu a los tres años: oficial mayor de la secretaría del Banco de San Carlos, lo que-y permite facer amistanza coles principales figures de les lletres d’España.

Daquella yera la dómina d’unos poetes prerrománticos que teníen alcuños bucólicos, moda na que s’inxere col alcuñu de Bermudo.

A suxerencia de Xovellanos, Leandro Fernández de Moratín va ser tamién secretariu de Cabarrús nel añu 1786.

En cuantes que dependientes del magu de les finances va unilos una amistá estrencha.

Pentemedies del “Epistolario” de Moratín somos a conocer daqué de la vida de Ceán d’esti tiempu.

La muerte de Carlos III supón la cayida del ministeriu de Floridablanca.

Carlos IV tres d’unes primeres xestiones afortunaes acaba siendo retiráu pol espíritu fuerte de la so muyer, María Luisa, que, a nun tardar muncho, concede privanza a Manuel Godoy.

Cai Cabarrús y Xovellanos arriesga’l prestixu en defensa del vencíu.

En Xixón y a primeru de xineru nómenlu xuez segundu de la villa.

Lo del Bancu de San Carlos diba costa-yos a Cabarrús, la cárce; a Xovellanos, el destierru y a Ceán una cesantía qu’implicaba’l treslláu a Sevilla, onde taba dende 1791 dirixendo l’arreglu del Archivu xeneral d’Indies.

Xovellanos, en 1795, comunícase col amigu al que-y da cuenta de tolos datos artísticos que va alcontrando, y tiénlu presente nel so primer testamentu.

Cabarrús, cuando tien el favor de Godoy, ístalu a que dé pasu a un nuevu ministeriu del que diben formar parte Francisco Saavedra y Xovellanos.

La revolución francesa ye como una nube amenazadora, sobremanera tres del establecimientu del directoriu n’ochobre de 1795.

Siendo Xovellanos ministru de Gracia y Xusticia (decretu del ventiún de payares de 1797), Ceán torna a Madrid y al ofrece-y el so paisanu una de les dos secretaríes d’Estáu que tenía al so cargu, a condición de que pa facelo con más fundamentu mandare trayer a Madrid diez grandes índices qu’él escribiera.

Esto ye’l so aval.

El rei va nomalu oficial de la secretaría d´Estáu de Gracia y Xusticia d’Indies.

En palaciu siguen les intrigues, y la envidia de Godoy pa con esos dos homes xustos a los que separtia de los sos ministerios respectivos en 1798.

Xovellanos, pola honradez que tien, va p’Asturies camín del destierru.

Ceán Bermúdez queda solu, trabayando na obra del “Diccionario histórico de los más ilustres profesores de las Bellas Artes en España”, que con refrendu de la Real Academia de la Historia va asoleyase en 1800.

Al añu siguiente Xovellanos ye desterráu a Mallorca y ellí, na cartuxa de Jesús Nazareno de Valldemuza, fai un nuevu testamentu nel que tien alcordanza pal amigu, que taba desterráu daquella en Sevilla.

Siguen carteándose enfotaos en que’l tiempu tien d’aclariar les coses.

La cayida de Godoy en 1808 fai qu’abdique Carlos IV en favor del so fíu, el Príncipe de Asturies.

Aporta dempués la guerra de la Independencia col cortexu de patriotes y afrancesaos.

Juan Agustín sigue en Sevilla a lo suyo, dedicáu a la investigación, solidarizándose coles Odes patriótiques de Manuel Quintana o del “Canto guerrero para los asturianos” de Xovellanos, que tres despidise d’él na islla de Lleón, retorna, ensin consiguilo al que nun ye puertu seguru nel so Xixón natal.

En 1811 muerren, ún tres d’otru, Juan Arias de Saavedra, Juan de Villanueva, el marqués de la Romana y el propiu don Gaspar.

La Real Academia de la Historia’l 10 de xineru de 1812 decide manifestar a Ceán el dolor pola perda del patriota insigne, y amás, que se faga una emponderación histórica a la qu’aporte los conocimientos insustituyibles un Juan Agustín que yá ye supernumberariu de tan docta istitución.

Pon manes a la obra de la que les Cortes de Cádiz inicien l’apertura hacia’l lliberalismu.

Naz destamiente en 1814 les “Memories para la vida del Excelentísimo Señor don Gaspar Melchor de Jovellanos y noticias analíticas de sus obras” que ye la primer y básica biografía que sirve de base a tolos estudios posteriores.

Fernando VII pisa tierra española en 1814.

La Guerra de la Independencia finó.

Los afrancesaos, nel esiliu, viven díes de señardá.

Ún d’ellos, Moratín, interésase añu tres añu pola suerte de Ceán.

Juan Agustín va morrer en Madrid el 3 d’avientu de 1829.

<< Listáu de Autores

<< Tornar al Entamu


Relatos
Toblerone
26 d'ochobre de 2007
Unviáu por: Pablo X. Suárez
Lleer relatu>> << Participar >>

Col sofitu de la Conseyería de Cultura, Comunicación Social y Turismu
© 2004 LLITERATU.com -
  |  Publicidá  |  Condiciones d'Usu  |  Información d'Empresa  |  Contacte con nós  |