LLITERATU PORTADA
LA CITA: "La vida nun ye sinón una continua sucesión d'oportunidaes pa sobrevivir." Gabriel García Márquez
Accesu Rápidu
EDICIÓN 11
18 d'ochobre de 2007
Asturies de premiu
Autores Asturianos
Cienfuegos y Sierra, Álvaro
Biografía

Alias :  Álvaro Díaz Cienfuegos y Sierra / Federico Granvosca / Álvaro Cienfuegos Villazón
Nacimientu:  27-II-1657 - Agüerina (Miranda / Belmonte de Miranda)
Defunción:  19-III-1739 - Roma

Naz n’Agüerina, conceyu de Belmonte de Miranda’l 27 de febreru de 1656.

Fíu d’Alvaro Díaz de Cienfuegos, oriundo de Teberga, señor de la casa d’Agüerina y de María Villazón Queipo de Llano, d’Escoréu (Pravia).

El tres d’ochobre de 1672 ingresó nel colexu de San Pelayo de Salamanca (colexu de los Verdes) que fuere fundación del arzobispu asturianu Valdés.

Ellí cursó estudios de xurista hasta l’añu 1676 en que pasa al Colexu de la Compañía de Xesús.

En 1693 desendolca’l cargu de Llector de Teoloxía nel Colexu de la Compañía de Salamanca.

Por petición del Xeneral de los Xesuites, P. Tirso González, escribió “Vida del P. Juan Nieto”.

Tres de dos años d’estudios na Universidá de Salamanca y a los 37 d’edá algamó la Llicenciuatura.

Pentemedies de don Juan Enríquez de Cabrera , almirante de Castiella, ocupa un puestu na Xunta de Medios, qu’arbitraba recursos en Madrid.

En 1694 redacta una “Memoria para impedir la formación en Salamanca de una Cofradía del Rosario”, por cuenta de que yá esistía na ciudá otra del mismu nome.

El 3 de setiembre de 1694 algama nel Colexu d’Ávila’l grau de Maestru en teoloxía.

Dos años más tarde ocupa la cátedra de “Víspores de Teoloxía” de la so Orde na Universidá de Salamanca, hasta que con data del 26 de mayu de 1700, Carlos II, cediendo a presiones del partíu borbónicu, allúgalu nesa ciudá.

Desta redacta nun solu tomu la biografía del Almirante de Castiella y la de San Francisco de Borja xesuita y IV Duque de Gandía.

Estes biografíes diben imprimise por Juan García Infanzón en Madrid en 1702.

En 1702 acompaña al Almirante nel so destierru voluntariu en Portugal, dando llugar a qu’en 1702 Felipe V declare vacante la so cátedra de Salamanca.

Tenía cuarenta y seis años.

Demientres l’Almirante collaboraba col archiduque Carlos III na llamada Guerra de Sucesión Española con tropes portugueses, Álvaro mantién bones rellaciones col rei Pedro de Portugal y col Cardenal Conti, llegáu pontificiu en Lisboa.

El 23 de xunu muerre n’Estremoz l’Almirante y al so llau taben los xesuites P. Casnerei y P. Cienfuegos.

L’archiduque Carlos torna a Viena pa ocupar el tronu qu’acabara de quedar vacante.

Cienfuegos torna a Portugal permaneciendo trece años en Llisboa como representante imperial y Maestru nos colexos de la Compañía na capital y Coimbra.

Al añu viniente a la so llegada a Viena (1716), apaez impresa en Milán y en castellán la obra Leopoldina, dedicada a relatar la vida y describir la época del gran emperador Leopoldo I d’Austria, que munchos atribúin pol so conteníu y estilu al P. Cienfuegos.

En 1717 apaecen en Viena los dos grandes volúmenes de la so “Aenigma Theologicum” na qu’atropa les enseñances y opúsculos redactaos por él durante’l so maxisteriu en Salamanca, en Compostela y en Llisboa.

Les encontraes opiniones de teólogos que despertó la obra llevantaron serios obstáculos na carrera de Cienfuegos.

Pero l’emperador Carlos IV apóyalu decididamente y consigue que’l papa Clemente XI-y dea la capiella cardenaliega’l 30 de setiembre de 1720 col títulu de San Bartolomé “in insula”.

En 1720 foi promovíu obispu de Catania, en Sicilia, a la muerte d’Andreas Riggio, siendo consagráu en Roma’l 26 de mayu de 1722.

L’emperador da-y el títulu de Conde de Mascallo, llocalidá siciliana de la so soberanía.

Aspira Cienfuegos al decanatu de Sacru Colexu Cardenaliciu.

A la muerte de Clemente XI aconcéyase’l Cónclave pa ellexir sucesor.

L’asamblea comenzó’l 31 de marzu de 1721 y el 20 d’abril entra Cienfuegos nella pa reforzar el partíu lliberal, qu’encabezáu por Althan agrupaba a trenta y dos cardenales.

Nel trescurrir de les delliberaciones tuvo Cienfuegos votos pa xubir al Solio.

Salio escoyíu Miguel Ángel Conti, baxo’l nome d’Inocenciu XIII, con quien Cienfuegos coincidiera ocho años enantes en Llisboa.

L’emperador Carlos VI sostién dafechu al Cardenal Cienfuegos y nómalu plenipotenciariu ante la Santa Sede, con data del 30 d’abril de 1722.

Cienfuegos treslládase a Roma istalándose probablemente nel Colexu de la Compañía, alternando les visites al obispáu de Catania.

En Roma foi visitáu pol daquella obispu d’Uviéu, monseñor Manuel José Endaya y Haro –1726- col envís de resolver delles cuestiones de la so diócesis, y ente elles la pretensión del cabildru d’algamar el rezu correspondiente al Santu Sudariu y a la Cruz de los Ánxeles que se guarden na Cámara Santa de la Iglesia uvieína.

El cardenal Cienfuegos faese cargu d’estes coses y de pasu envía a Uviéu la birreta del beatu Siervu de Dios Inocenciu XI. Desta manda a Agüerina les reliquies de San Fructuosu.

A finales de febreru de 1724 muerre Inocenciu XIII y Cienfuegos endiéntrase otra vegada nel cónclave como portavoz del partíu imperial y nel que tres llargos y encarnizaos discutinios nómase pontífice a Orsini col nome de Benedictu XIII. Al quedar vacante la sede primada de Monreal (Sicilia) por muerte del cardenal Giudicide, ye nomáu Cienfuegos pa sucedelu, con fecha del 21 de febreru de 1725.

Con esta prebenda correspuénde-y a Cienfuegos los munchos bienes d’aquella Archidiócesis y el títulu de protector de Sicilia y Malta.

Na Sagrada Congregación de Ritos emite Álvaro, el 18 de marzu de 1727, un dictame de doce fueyes sobro la obra de Fr. Íñigo de la Cruz, “Defensorio de Religiosidad de los caballeros militares”publicada en Madrid en 1731 por Bernardo Peralta en 1731.

Obtién Cienfuegos pal Colexu Vieyu de San Bartolomé de Salamanca el rezu de San Juan de Sahagún , y nesi mesmu añu de 1728 ye nomáu Cardenal Protector de Portugal.

Publica en Roma en 1728 “Vita abscondita…”, que provocó un perxabaz discutinu relixosu.

Intervién Cienfuegos na beatificación del misioneru minorita capuchín Fr. Fiel de Sigmaringa, declaráu mártir por Benedicto XIII el 24 de febreru de 1729.

Cienfuegos continuó fiel a emperador Carlos IV al que-y mandaba puntuales informes no que cinca al puntu de vista de la Curia pa col poder políticu.

Ocupaes, Nápoles y Sicilia polos españoles , quíten-y la sede de Monreal.

L’Emperador pa recompensalu failu obispu de Funff-Kirchen, la Pecs d’anguaño (n’Hungría).

Dos años dempués redacta una nueva pastoral dirixida al pueblu y cleru de la nueva Diócesis.

Muerre en Roma’l 19 d’agostu de 1739. .

<< Listáu de Autores

<< Tornar al Entamu



Col sofitu de la Conseyería de Cultura, Comunicación Social y Turismu
© 2004 LLITERATU.com -
  |  Publicidá  |  Condiciones d'Usu  |  Información d'Empresa  |  Contacte con nós  |